Hugmyndir

Gott með kaffinu – Ketó karmellubitar

24.10.2019

Vantar þig eitthvað ketóvænt til að eiga í frystinum sem er gott með kaffinu? Keto karmellubitarnir eru samsettir úr bökuðum möndlusmjörkökum, karamellu og súkkulaði. Samsetning er svipuð og ‘millionaires shortbread’ í Ketó búningi.


Flórsykur úr gervisykri:

Notaðu blandara svipaðan og NutriBullet og malaðu gervisykur (Sweet Like Sugar) svo hann verði eins og flórsykur.

Malaðu eins mikið magn og uppskrift segir, eða meira og geymdu í lokuðu íláti. Svo átt þú hann tilbúinn næst þegar þú bakar.


Möndlusmjörkaka:

Hráefni:

150 gr smjör
150 gr Möndlumjöl
1 tsk vanilludropar
4 msk gervisykur (gervi-flórsykur)

Aðferð:

  • Ofnin hitaður í 180°C og settu bökunarpappír í 20x20cm bökunarform
  • Blandaðu saman smjörinu sem hefur verið skorið í teninga og sykrinum í 3 til 4 mín í hrærivél eða matvinnsluvél. Blandaðu vanilludropum við.
  • Bættu við möndlumjölinu, smátt og smátt og hrærðu áfram í 2 mínútur.
  • Þrýstu deiginu niður í bökunarformið og bakaðu í 18-20 mínútur.
  • Taktu kökuna úr ofninu og leyfðu henni að kólna.

Ketó karmella

Hráefni:

75 gr smjör
1 dl sykurlaust síróp
2 msk Sukrin gold*
1,5 dl rjómi
1/2 tsk Xanthan gum
10 dropar Stevia karmellu eða vanilludropar

Aðferð:

  • Hitaðu smjörið, sírópið og sykurinn saman í potti. Blandan þarf að ná vissum hita þar sem þetta verður karmella en passa að hún dökkni ekki of. Gott að miða við að leyfa blöndunni að malla við háan hita þangað til hún hækkar upp barminn á pottinum og lækka þá hitann. Passa að hræra reglulega í blöndunni svo hún brennur ekki við.
  • Bættu svo við rjómanum og leyfðu þessu að malla í 30-50 mínútur eða þangað til orðin þykk karmella. Hrærðu reglulega í henni. Ef þér finnst eins og sykurinn er að skilja sig frá rjómanum hækkaðu hitan aftur í smá tíma og lækka svo aftur.
  • Bættu við Stevia dropum.
  • Taktu pottinn af hellunni og settu Xantham gum út í blönduna og hrærðu vel í.
    Xantham Gum er þykkingarefni og hjálpar karmellunni að þykkna og verða stöðug við stofuhita.

Ef þú átt ekki til Sukrin Gold (gervi-púðursykur) getur þú notað 1,2 dl af sírópi í staðinn.

Helltu karmellunni yfir smjörkökuna og dreifðu jafnt úr henni. Stráðu örlitlu sjávarsalti yfir.

Leyfðu kökunni og karmellunni að kólna aðeins áður en súkkulaðið er sett ofan á.

Hægt er að rista ca. 50 grömm af möndlum og pekanhnetum og skera í smábita til að bæta við karmelluna til að breyta aðeins til.

Tillaga að breytingu

Súkkulaði

Þú hefur val um að kaupa tilbúið sykurlaust súkkulaði og bræða (Passaðu Net Kolvetni fyrir Ketó) eða búið til þitt eigið súkkulaði.

Mæli með mjólkursúkkulaðinu frá Lilly´s sem fæst í völdum Krónu verslunum.

Ketó súkklaði:

Hráefni:

100 gr kakósmjör (e. Cocoa butter)
6 msk Kakó (t.d. frá Nóa Siríus)
4 msk gervi-flórsykur (t.d. malað Sweet like sugar)
8 dropar af Stevia vanilludropum

Aðferð:

  • Bræddu kakósmjörið í potti og hrærðu reglulega í.
  • Bættu við kakói og sykri og blandaðu vel saman.
  • Bættu vanilludropum við.
  • Helltu súkkulaðiblöndunni yfir karmelluna og settu í frysti.

Leyfðu kökunni að vera í frysti í 2 tíma eða í kæli yfir nótt áður en þú skerð í bita. Gott er að geyma Twix bitana í frysti og færa í kæli 15-30 mínútur áður en þú ætlar að njóta þess að fá þér Ketó Twix bita.

Njótið.


Þú getur notað sömu uppskrift af Ketó karmellu fyrir karmellusósu með því að hafa 2,0-2,5 dl af rjóma og sleppa Xantham Gum. Tilvalið að nota með ís, ostaköku eða skyrtertu.

Deildu með vinum

ELKO PÓSTLISTINN

Skráðu þig og fáðu tilkynningar um tilboð, fræðsluefni og ELKO blaðið sent.