Það ættu allir að vera farnir að þekkja döðlugott úr saumaklúbbnum, afmælum eða öllum öðrum veislum, enda syndsamlega gott.

Hér höfum við döðlugott fært upp á næsta stig, snickers-döðlu-gott!

Þessi uppskrift inniheldur bæði hnetusmjör og hnetur svo varúð, ofnæmispésar ættu ekki að lesa lengra – nema jú auðvitað er hægt að sleppa þá ofnæmisvöldunum og setja t.d. dumble eða lakkrís í staðinn.

Hér er það sem þú þarft:

• 250 gr döðlur (hægt að kaupa saxaðar)
• 110 gr smjör
• 3 msk hnetusmjör
• 1 ½ tsk vanilludropar
• 1 dl salthnetur (má saxa aðeins niður til að minnka bitana)
• 3 dl rice krispies
• 1 dl haframjöl (fínmalað í blandara (notaði Nutri Ninja)
• 80-120 gr rjómasúkkulaði (nóa hnappar) – fer eftir hversu mikið súkkulaði þú vilt hafa á)
• Áhöld: Pottur,20×20 cm Eldfast mót eða álbox, smjörpappír, töfrasproti, blandari (til að mala haframjöl).

Aðferð:

1. Skerið smörið í nokkra bita og setjið í pott.
2. Saxið döðlurnar eða skerið til helminga bætið í pottinn. (hægt er að kaupa Saxaðar döðlur)
3. Settu pottinn á helluna og hitaðu þar til smjörið bráðnar.
4. Hrærðu reglulega í pottinum og leyfðu blöndunni að malla við lágan hita í 5 mínútur.
5. Taktu nú pottinn af hellunni og leyfðu blöndunni að kólna í fáeinar mínútur.
6. Notaðu töfrasprota til að mauka döðlublönduna (bara í pottinum).
7. Bættu við vanilludropum og hnetusmjöri og hrærðu vel saman.
8. Notaðu blandara til að mala haframjölið í fínmalað hveiti. Gott er að nota líka nutribullet.
9. Færðu haframjölið í skál og taktu 3 matskeiðar af döðlublöndunni og blandaðu saman við –  blandan verður þykk eins og deig.
10. Bættu nú Rice krispies og salthnetum við döðlublönduna sem er enn í pottinum.
11. Settu smjörpappír í eldfastmót og þrýstu svo döðlublöndunni í formið á smjörpappírinn. Hafrablöndunni er svo bætt við ofan á.
12. Settu þetta nú í ísskáp og leyfðu gottinu að kólna í minnst klukkustund áður en þu setur súkkulaðið ofan á.
13. Bræddu súkkulaði í vatnsbaði eða í örbylgjuofni (1/3 í skál í 30 sek í 2 skipti við 700W, bæta svo rest við og hita í 25 sek í viðbót, hræra alltaf á milli og hita oftar ef þarf).

Ef þú vilt hafa þetta enn meira djúsí:

Hægt er að toppa gottið með karamellusósu (hægt að fá sykurlausa frá Callowfit) ofan á hafrablönduna, áður en súkkulaðið er sett ofan á en það má sleppa því. Einnig er hægt að setja 2 tsk af MACA dufti í döðlublönduna en það gefur örlítið núggat-karamellu keim.

Ó verði ykkur nú að góðu! Það er óskaplega gott að eiga svona gotterí í frysti og taka út með kaffinu.

Uppfært 2. maí 2023