Í hröðum heimi tækninýjunga í raftækjum hefur ELKO lagt mikið upp úr því að halda starfsfólki sínu vel upplýstu um þær vörur og tækninýjungar sem fyrirtækið hefur upp á að bjóða. Því til merkis sendi ELKO á dögunum 25 aðila á stærstu raftækjaráðstefnu Norðurlandanna sem haldin er af Elkjöp í Noregi en ELKO fær boð á ráðstefnuna ár hvert í gegnum vörumerkjasamning sinn við samsteypuna. Á ráðstefnunni fær starfsfólk tækifæri til að kynna sér nýjar vörur, tækninýjungar og sækja sér fræðslu.

Stærsta raftækjaráðstefna Norðurlandanna

Ráðstefnan samanstendur af vörusýningum sem skiptast í Home og Tech ásamt fjölmörgum kennslustofum þar sem nýjustu vörurnar eru teknar fyrir af þjálfurum og birgjum. Á ráðstefnunni starfa um 1.000 manns við að þjálfa og fræða um 6.000 gesti um nýjustu tækni og strauma á raftækjamarkaði en þarna voru samankomnir yfir 140 framleiðendur og birgjar. 

Það sem stóð einna helst upp úr fyrir starfsfólk ELKO á ráðstefnunni er sú áskorun sem raftækjaframleiðendur standa frammi fyrir í umhverfismálum. Lykiláhersla raftækjaframleiðenda til framtíðar er að leggja áherslu á lengri líftíma tækja sem og viðgerðar- og endurvinnsluhæfni þeirra. 

Meira um þjálfun og fræðslu í ELKO 
ELKO hefur á síðustu árum sett aukinn kraft í fræðsluefni fyrir starfsfólk og hjá fyrirtækinu starfa tveir aðilar sem sinna eingöngu nýliðamóttöku, þjálfun og fræðslu. Því til viðbótar er rafræn kennsla í boði í gegnum stafrænt mannauðskerfi sem og regluleg námskeið haldin frá framleiðendum og birgjum beint til starfsfólks. Lykilmarkmiðið er að allt starfsfólk sé búið að fræðast um og þekki vörurnar sem eru í sölu og sé tilbúið til þess að taka á móti vel upplýstum viðskiptavinum og aðstoða þá við að finna réttu heildarlausnina við þeirra þörfum.