**Fróðleikur**
Lengdu líftíma raftækja
**12.10.2023**

Með raftækjum fylgir notendahandbók sem veitir ýmist almennar upplýsingar og ráð sem og öryggisupplýsingar. Með því að fylgja ráðum handbókarinnar komumst við hjá skemmdum á tækinu og lengjum líftíma þess.

Við höfum tekið saman nokkur góð ráð sem lengja líftíma raftækja.

Farsímar

Settu högghelt hulstur utan um símann
Settu skjávörn á símann*
Gott er að takmarka hleðslugetu farsímans í 80% sem getur lengt endingartíma hennar.

*Í ELKO eru til dæmis til skjávarnir frá Panzerglass og Mobile Outfitters.

Ísskápar

Varast skal að umbúðir eða matur hindri loftrásir kæliskápsins.
Næg hringrás lofts þarf að vera til staðar til þess að koma í veg fyrir ofhitnun.
Það þarf að þrífa þéttingu kæliskápsins reglulega til þess að tryggja að hann lokist almennilega
Ráðlagt er að þrífa kæliskápinn að innan reglulega til þess að fjarlægja óhreinindi og koma í veg fyrir lykt.
Ef þú ert með NoFrost kæli- og frystiskáp ætti ísing ekki að safnast saman í frystihólfi og því ekki þörf á að afþýða skápinn reglulega. Ef skápurinn þinn / Frystir er LowFrost myndast 25% minna hrím en skápur sem hefur ekki ‘Frost’ tækni, sem þýðir að þú þarft að affrysta skápinn á ca 5 ára fresti.

Mynd eftir Max Rahubovskiy / Pexels

Þvottavélar

Nota skal hreinsikerfi þvottavélar a.m.k. einu sinni í mánuði, ef þvottavélin býður ekki upp á sjálfhreinsikerfi skal stilla hana á hæsta hitastig.
Varast skal að yfirhlaða þvottavélina.
Það þarf að tæma alla vasa áður en þvottavélin er sett af stað. Peningar, steinar, naglar, skrúfur og aðrir smáhlutir geta valdið umfangsmiklum skemmdum á tromlu.

Þurrkarar

Hreinsa skal lósíu og fínsíu eftir hvert þurrkferli.
Varast skal að yfirhlaða þurrkarann.
Tryggja skal að næg loftræsting sé í rýminu svo þvotturinn nái að þorna almennilega.

Kaffivélar

Nota skal hreinsitöflur í kaffivélar að minnsta kosti á tveggja mánaða fresti eða eftir ráðleggingum framleiðanda – athugið að þetta á einungis við um sjálfvirkar og hefðbundnar kaffivélar
Það er mismikil olía í kaffibaunum sem getur haft skaðleg áhrif á malara kaffivéla – fara skal eftir ráðleggingum framleiðanda hvað þetta varðar
Það þarf ávallt að lyfta handfangi hylkjavéla upp eftir að hafa hellt upp á kaffi.
Þrífa hylkjakaffivélar reglulega, hægt að er kaupa sérstök hreinsihylki til þess að koma í veg fyrir myglu. Hylkjabox mega yfirleitt fara í uppþvottavélina.

Mynd eftir Vlada Karpovich from Pexels

Ryksuguvélmenni

Það þarf að skipta um síu í ryksuguvélmennum eftir ráðleggingum framleiðanda. Í sumum tilvikum eru síurnar þvoanlegar, þá skal skola þær með volgu vatni og leyfa þeim að þorna í sólarhring.
Þrífa skal bursta ryksuguvélmenna reglulega. Hafi of mikil óhreinindi sest á burstana getur það takmarkað getur ryksugunnar.
Það þarf að þurrka af skynjurum ryksugunnar reglulega, ef skynjarar eru óhreinir eða móðugir getur það komið í veg fyrir kortlagningu hennar og hún getur villst.

Veggofnar / eldavélar

Ráðlagt er að djúphreinsa ofninn að minnsta kosti tvisvar sinnum á ári, ef sjálfhreinsikerfi er til staðar í ofninum skal nota það.
Eftir djúphreinsun ofnsins skal kanna hvort hurðarþétting sé í lagi. Ef hurðarþétting hefur orðið fyrir hnjaski eða er orðin slitrótt þarf að skipta henni út.

Uppþvottavélar

Varast skal að glös, diskar eða aðrir munir hindri snúning skolarma.
Varast skal að yfirhlaða uppþvottavélina.
Þrífa þarf síuna sem er á botni uppþvottavélarinnar reglulega, ef sían er skemmd þarf að skipta henni út um leið vegna hættu á að vélin stíflist.

Prentarar

Prenta skal reglulega út svo blek þorni ekki upp í prenthausnum.
Geyma skal blekhylki lóðrétt á þurrum og dimmum stað ef þau eru ónotuð
Geyma skal dufthylki lárétt á þurrum og dimmum stað ef þau eru ónotuð.

Fartölvur

Varast skal að hindra öndun fartölvunnar, það takmarkar kælingu. Hitastig fartölvu hefur bein áhrif á vinnsluhraða hennar.
Ráðlagt er að rykhreinsa fartölvur reglulega. Hægt er að kaupa þrýstiloft í brúsa til þess að auðvelda ferlið.